“TIRA-DOR, tini-tira” naman ni OIC Regional Director P/Sr. Supt. Balligi Agnanayon Tira an PNP Naga kan magpaluwas nin ilegal na relieved order ki OIC COP Benjamin Suratos asin sa 18ng miembros kan policia kan Ciudad nin Naga na langtadan na pagbalga kan PNP Reform Act of 1998 asin memorandum kan National Police Commission (Napolcom).
Bueltada ini kan City Hall contra ki Tira kan basang na i-pulled out si OIC Chief of Police P/Supt. Benjamin Suratos asin 18ng miembros kan PNP Naga nganing idestino sa Camp Simeon Ola sa Ciudad nin Legaspi asin sa iba pang mga provincias kan Kabikolan.
Sa session regular kan Sanggunian Panlungsod kan Martes (Junio 19) nagpasar nin resolution na hinahagad ki PNP Chief Director General Oscar Calderon na patalsikon na sa Bicol PNP an pasaway na OIC RD huli kan mga pang-aabuso sa policia kan ciudad asin enot nang ginibo duwang aldaw antes kan eleccion kan Mayo 14. Basang na pig-relieved an 16 na miembros kan PNP Naga nganing matawan nin justificacion pig-acusaran na mga envuelto sa ilegal na droga mayo man nganing prueba asin caso.
Si Consejal John Bongat, chairman kan Committee on Public Safety kan Sanggunian Panglungsod iyo an nagpadreno kan resolucion asin sinuportaran kan gabos na miembros kan consejo.
Na-enot kaini, si Alcalde Jesse M. Robredo pigsurog an afectadong miembros kan PNP Naga sagcod na pigka-olay si Calderon sa reclamo kan mga pang-aabuso asin ilegal na pang-ookag kan miembros kan policia.
Nagpangako si Calderon na sa dai mahahaloy nakatalaan accionan an reclamo kan City Hall contra sa OIC RD nganing sa lalong madaling panahon sikaran na sa puesto mientras na may inaatubang na nin mga casong illegal detention asin sa Ombudsman na pigsangat kan afectadong police Naga.
Si Bongat sa saiyang previlege speech pigtuyaw si Tira sagcod na sinabihan na tirador asin tini-tira naman an policia kan Naga mientras na mga ilegal an directiva pati na an deployment nin miembros kan Regional Mobile Group na mayong coordinacion sa PNP Naga.
Langtadan na pagbalga kan PNP Reform Act of 1998 na an jefe ejecutivo local may poder asin supervision sa PNP siring kan pagbugtak, pagpahali, asin pagribay nin jefe de policia. An ano man na accion contra sa COP asin miembros kan policia sa sarong ciudad o banwaan dapat may coordinacion sa alcalde.
Afuera pa kaini, an Napolcom nagpaluwas nin Memorandum na an designadong OIC regional director maging OIC PD dai awtorisado na magbalasa nin miembros kan policia.
Pigtutubodan kan PNP Naga na pambabalos ni Tira an relieved order matapos magsangat sinda nin casong illegal detention asin sa Ombudsman na kabali sa caso digdi si dating PD
P/Sr. Romeo Mapalo na nagretiro na sa servicio kan Mayo 30, 2007.
An relieved order petsado Junio 14, 2007 mayo man nin dahilan kun tano ta hinahali an mga afectadong polis.
An sinambit na miembros kan policia sa tabang kan City Hall, sinugo ni Robredo si City Legal Officer Angel Ojastro na darahon sa corte an isyu sagcod na naghagad nin temporary restraining order (TRO). Nagpaluwas nin TRO an jusgado kaya napugolan an implementacion kan order.
