AN mga Senador na kaalyado ni Presidente Gloria Macapagal-Arroyo asin iba pang miembros kan oposicion magsarong fuersa kun magkaka-baranga an oposicion sa pag-pili kan bagong Senate president.

        An oposicion sa senado iyo ngonian an nag-dodominar matapos ganahon kan kadakli kan candidato kan Genuine Opposition (GO) kan nakaaging eleccion alagad delicadong magka-baranga nin amay huli kan saindang ambicion sa senate presidency.

        Ini an pahayag ni Senador Joker Arroyo sa mga miembros kan prensa sa Ciudad nin Naga kan siya maging juespe de honor sa pagcomomerar kan ika-59ng Charter Day kan Naga.

        An mga nag-aambicion sa senate presidency iyo sinda Senador Aquilino Pimentel, Mar Roxas asin si incumbent senate president Manuel Villar. Mismo si Senador Panfilo Lacson (GO) nag-ako na may kadificilan na magka-igwa nin sarong “solid opposition bloc” ini parte kan preparacion kan presidential elections na tulong taon pa an pighahalat.

        Sinabi kan Bicolanong senador na siya yaon sa alyado kan administracion kaya naghahalat sana siya kun ano an magiging resulta sa pagpili kan bagong senate president alagad kun magkaka-baranga posibleng magkasaro an nasa administracion asin ibang oposicion.

        Saro pang Bicolano an nagtuyaw huli kan presidential ambition kan iba niyang pag-iriba kun siisay an masunod na pamayo kan senador sa pagbukas kan ika-14ng congreso sa masunod na bulan kaya pueding magka-baranga an saindang grupo.

        An mga oposicion na senador nagcoconducir nin mga dialogue nganing determinaran kun siisay an saindang mamanokon sa Senate presidency sa Julio 23, 2007.