BAKONG nakatabang sa organisacion kan PNP sa Ciudad nin Naga an pang-aabuso kan PNP Bicol kan sahutan na envuelto sa ilegal na droga an 15ng miembros kan policia kan ciudad ngani sanang matawan nin justificacion an biglaan na pag-pull-out sainda pasiring sa Camp Simeon Ola, duwang aldaw antes kan eleccion kan Mayo 14. Sa drug test gabos negativo sa pag-usar sa sahot nin droga.
Nagkapera sa mga pungot na miembros kan PNP Naga na habo nang magpasambit kan saindang pangaran nagsabi na malinaw na pagbalga sa deretso humano an naging accion ni P/Sr. Supt. Agananayon Balligi Tira, OIC regional director, apesar na mayong ginibong investigacion acusado na tulos sa caso sa ilegal na droga. Afuera pa kaini si personal na mga kagamitan kabali na an cellphone kan mga polis pig-confiscar ngani sanang dai maka-apod tulos sa saindang familia o abogado nganing maghagad nin tabang.
Disganado na an saro sa 15ng polis asin nagsabi na habo an PNP Bicol sa naggigibo nin toltol kun halion sa servicio gibohon na huli ta nararatakan pa an saindang pangaran.
Si alcalde Jesse M. Robredo, kinaagahan matapos i-pull out an sinambit na miembros kan PNP Naga tulos pighampang si OIC Chief of Police Benjamin Suratos nganing aramon an nangyari sa pag-bawas nin policia digdi mientras na pig-aandaman na an pagmantenir pace orden sa eleccion. An simbag ni Suratos na dai siyang magiginibo huli ta an orden hali ki Tira asin provincial director Romeo Mapalo.
Sinabi kan alcalde na nagplantiar na sinda nin petition for Habeas corpus sa corte contra ki Tira asin ki Mapalo huli kan pang-aabuso sa deretso kan polis. Yaon na RTC branch 19 an caso asin an vista gigibohon alas 8:00 ngonian na aga.
Sarong aldaw matapos kan eleccion pigbuelta na sa PNP Camarines Sur Office an 15ng polis asin liwat pina-apod ni Tira sa Regional Command mientras na masumiter nin investigation report asin recomendacion si Mapalo sa oficina kan PNP Bicol.
Saro sa negativo sa drug test si SPO1 Edgardo Sto. Domingo, inatake nin alta-presion asin naka-confined sa Naga City Hospital. Alagad dawa na ngani negativo sa droga dai pa contento an OIC regional director nagsabi na dai man nangangahulugan na kun negativo sa drug test libredo na sa caso sa ilegal na droga.
Pig-aacusaran ni Robredo an provincial director na nagpagamit sa politico asin risang marhay na tuyong pig-pull out an mga polis nganing kulang an personajes kan PNP Naga sa eleccion mala ngani pati na si miembros kan SWAT team an pigbaklas sa ciudad.
An 15ng miembros kan PNP Naga na pig-sasahotan ni Tira na envuelto sa droga pati na an sahot na envuelto sa partisan politics iyo sinda; SPO4 Elmer Pitallano, P/Sr. Inspector Jojo Perez, SPO3 Edwin Azañes, PO2 Tomas Rentoy, PO1 Edmundo Sto. Domingo, SPO1 Edgardo Sto. Domingo, (dating awardee bilang outstanding police asin iba pang mga narecibeng ondra) SPO1 Ricardo Siera, SPO1 Francisco Destura, SPO3 Arthur Motos, PO2 Roberto Queriba, PO2 Rey Alvarez, PO1 Remie Genova, PO3 Romeo Ranara asin PO1 Rene Ranara.
Si Robredo nagsabi na dai siya tubod sa sinambit na sahot sa pagkaka-envuelto sa droga asin ini nakakaraot sa reputacion kan pangaran kan polis mientras na an eleccion sarong aldaw tapos na alagad an pang-raraot sa pangaran dakulang danyos.
