An Coalition for Citizens’ Constitution (C4CC), sa Ciudad nin Naga asin Camarines Sur nagpatanid na ipipirit kan mga congresista na kaalyado ni Presidente Gloria Macapagal-Arroyo na retokihon an 1987 constitution sa paagi kan Constituent Assembly (Con-Ass) mala ngani nag-angat si Congresista Luis R. Villafuerte kan segundo distrito kan Camarines Sur na dadarahon ninda an isyu sa Corte Suprema na dai na kaipuhan an voto kan Senado nganing idagos an pag-enmienda kan constitucion.

        Kan Lunes na bangui ginibo an motorcade sa mga mayor na calle kan Ciudad nin Naga sa paagi kan saindang Busina laban sa Con-Ass na pig-participaran kan manlaen-laen na lideres asin miembros kan C4CC. Nakalunad sinda sa mga privadong vehiculos na nagbubusina asin torotot bilang protesta sa charter change na pighihimo kan mga kaalyado ni PGMA nganing mapalawig sa puesto sa Malacanang.

        Si Rene Gumba. lider kan C4CC sa Ciudad nin Naga nagsabi na kun si Villafuerte nagpahayag na dadarayon an isyu sa Corte Suprema nin huli ta haros nakaka-seguro sinda na papaboran mientras na kadakli na kan mga magistrado sa SC mga nombrado na kan presidente. Huli kaini duda na sinda sa mga magistrado kaya ngani an mga protesta laban sa pigtutulod na Con-Ass naghihiwas asin suportado na kan mga sectores asin namamanuan.

        An C4CC, sarong national coalition na compuesto nin mga non-government and peoples organizations na envuelto sa pag-implementar kan mga programa asin nakiki-pagtabangan sa mga sectores sa enterong nacion.

        An kaparejong grupo contra sa Cha-Cha organisado na sa Cebu, Davao, National Capital Region, General Santos City, mga provincias digdi sa kabikolan asin igwa pang masunod na ciudades.

        Si dating Alcalde Sabas Mabulo kan San Fernando, Camarines Sur na activong lider kan NGO sa premir distrito, nagparticipar sa Busina asin segun saiya dapat lang suportaran an movimiento laban sa Con-Ass huli ta risa nang marhay an motivo kan administracion nganing dai sinda maribayan sa puesto.

        Sinda dai tubod sa mga paliwanag kan administracion na an intencion sana sa cha-Cha iyo an economic provission, alagad oras na mabukasan na an constitucion pati na an extension kan saindang termino iyo an papaki-araman nganing padagos na magkurapot sa puesto.

        Nuodmang Viernes an grupo liwat na magtitiripon nganing orolayan an sunod nindang hiro protesta particularmente an pagsabay na sa mahiwas na rally sa maabot na Deciembre 12, 008.

        Mientras tanto, sa maabot na Deciembre 10, 2008 an mga militante sa Camarines Sur asin Ciudad nin Legaspi nakatalaan man na maglansar nin protest rally contra sa pigtutulod na Cha-Cha kan mga congresistang kaalyado ni Presidente Arroyo.


IBASURA AN CON-ASS. Si Rene Gumba (nakatindog) saro sa mga lider kan C4CC sa Ciudad nin Naga kahampang an saiyang mga pag-iriba sa paghaman nin sunod na plano sa gigibohon na protesta contra sa Con-Ass.