Matapos kan nadiscobreng collection scandal sa Naga City Public Market (NCPM) na envuelto an Php.1.9 milliones, sarong privadong corporacion an nagsurat ki Alcalde Jess Robredo na nag-oopresir para sa rehabilitacion asin pagmanijar kan mercado sa kasundoan na saindang arkilahon.
An surat narecibe oficina kan alcalde kan Noviembre 25, 2008 na pirmado ni Manuel I. Santos, General Manager kan ITHIEL Corporation/Suki Chain of Markets asin ni Wyden R. King, chairman asin CEO kan Armadillo Holdings, Inc. na may oficina sa B-30 Mayon St., cor N. Roxas Sr. Bgy. Sta Teresita, Ciudad nin Quezon.
An intencion kan corporacion pig-indorsar na ni Robredo sa Sanggunian Panlungsod sa committee on market affairs ni Consejal William Del Rosario.
Sinabi ni Florencio Mongoso, Jr. Officer Incharge kan NCPM an bagay na nakatalaan na tukaron sa pigtalaan na City Development Meeting sa Deciembre 12, 2008 mientras na mayo pang panindugan an consejo asin ejecutivo local kun saindang tatakmaon an pig-oopresir rehablitacion na igwang pighahagad na condicion.
An ITHIEL Corporation sa presente iyo an nagmamanijar kan mga mercado sa Dapitan, Ciudad nin Quezon, San Pedro, Laguna asin Alaminos, Pangasinan. Igwa pa sindang ginigibong negosacion sa local na gobierno kan Batangas sa kaparejong katuyohan.
An mercado publico nasulo an ika-duwa asin ika-tulong escalong kan nakaaging Noviembre 6 asin an pinakahuring report kan City Engineer’s Office maabot sa 152 milliones pesos si danyos.
Sa ngonian dawa na ngani an plano kan liderato ni Robredo na matapos an rehabilitacion kan NCPM antes matapos an saiyang termino sa 2010, alagad an problema iyo an dakulang fondo na kaipuhan an sobra sa l50 milliones nganing maponan an rehabilitacion.
An cierto pa sanang fondo iyo an 20 milliones pesos na calamity fund mientras na si mga nag-pangakong senador nin ayuda financial sa rehabilitacion kabali si DBM Secretary Rolando Andaya, Jr. dai pa maaraman kun nuarin marerecibe kan local na gobierno kan ciudad.
Mientras tanti, an na-vacanteng market supt.matapos mabadil gadan si Paco Ojeda sa dai mahahaloy mabubugtakan na nin karibay huli ta igwa nang mga aplicante na kinababalihan ninda Rene Comelio Morano IV, Prudencio Rodriguez III asin Nepthali Pabines. Sa puestong assistant market supt. na dating si Frediric Arias na nagdemiter sa puesto huli kan mga nadiscobreng anomalia sa coleccion, igwa nang duwang mga aplicante na sinda Angel Gonzales asiin Nepthali Pabines.
Piglalaoman na sa dai mahahaloy ma-nombra na si Robredo sa mga vacanteng puesto sa NCPM.
